ziya-e-sub.h-e-tabassum ki aarzu na karo
ki taak men abhi tira-shabi hai be-ḳhabaro
sama sakenge na bikhre hue hasin jalve
hisar-e-chashm abhi aur kuchh kushada karo
jo paḌh sako to ye ḳhamosh-o-bad-numa chehre
ḳhud apne vaqt ki tariḳh bhi hain dida-varo
ḳhushi ki dhuup men jalta hai zindagi ka badan
gham-e-latif ke saa.e kahan hamen ham-safaro
ruḳh-e-hayat pe raqsan hai jo ḳhushi ki tarah
vo soz-e-ishq ki adna kiran hai be-basro
hamin se sub.h-e-banaras hamin se sham-e-avadh
hamin se dilli ki galiyan hasin thiin taj-varo
gavahi dete hain tariḳh-e-ahd ke safhe
ye aur baat hai ab tum na e’tiraf karo
ḳhizan ko rang-e-baharan jo de sako ‘nazim’
kabhi bahar-e-gurezan ki justuju na karo
Leave a Reply