raat ajab aseb-zada sa mausam tha
apna hona aur na hona mubham tha
ek gul-e-tanhai tha jo hamdam tha
khaar o ghubar ka sarmaya bhi kam kam tha
aankh se kat kat jaate the saare manzar
raat se rang-e-dida-e-hairan barham tha
jis aalam ko hu ka aalam kahte hain
vo aalam tha aur vo aalam paiham tha
khaar khamida-sar the bagule be-avaz
sahra men bhi aaj kasi ka matam tha
raushniyan atraf men ‘zehra’ raushan thiin
aine men aks hi tera maddham tha
Leave a Reply