Ahmad Sagheer Siddiqui
asman-zad zaminon pe kahin nachte hain
ham vo paikar hain sar-e-arsh-e-barin nachte hain
apna ye jism thirakta hai bas apni dhun par
ham kabhi aur kisi dhun pe nahin nachte hain
apne rangon ko tamashe ka koi shauq nahin
mor jangal men hi rahte hain vahin nachte hain
tan ke dere men hai jaan mast qalandar ki tarah
vahime thak ke jo rukte hain yaqin nachte hain
kab se ik khvab hai ankhon men ki taabir bhi hai
us men gaate hain makan aur makin nachte hain
Leave a Reply