Nooh Narvi
dil-sitani dilruba.i par ghamanD
aap ko hai ḳhush-ada.i par ghamanD
janta huun us ka nibhna hai muhal
kya karun main parsa.i par ghamanD
naaz hai qatil ko apni tegh par
tegh ko hai kaj-ada.i par ghamanD
rahm un ko hal-e-gham par aa gaya
dil kare be-dast-o-pa.i par ghamanD
asiyon ko rahmat-e-haq par ghurur
zahidon ko jab.ha-sa.i par ghamanD
guftugu bhi mujh se tum karte nahin
is qadar is ḳhush-ada.i par ghamanD
parda-e-dar par kisi ko naaz hai
ham ko nazron ki rasa.i par ghamanD
ab unhen hai dil-navazi ka ḳhayal
tha jinhen tegh-azma.i par ghamanD
phir giraftar-e-qafas ho ja.unga
hai abas mujh ko riha.i par ghamanD
ho gaya jis ke sabab se main asiir
tha mujhe us ḳhush-nava.i par ghamanD
gharq kar dega unhen tufan-e-ishq
‘nuh’ ko hai na-ḳhuda.i par ghamanD
Leave a Reply