vo rah-o-rasm na vo rabt-e-nihan baaqi hai
phir bhi is dil ko mohabbat ka guman baaqi hai
ab bhi logon ki zaban par hain ka.i afsane
apna qissa ba-hadis-e-digran baaqi hai
ab nahin mujh ko mayassar tira daman phir bhi
joshish-e-dida-e-ḳhun-nab-fashan baaqi hai
gul-o-nasrin ke tasavvur se miri sanson men
nik.hat-e-zulf-e-masiha-nafasan baaqi hai
muddaten guzrin tiri diid ko par ankhon men
aaj bhi raqs-e-baharan ka saman baaqi hai
tere andaz-e-sitam tere taghaful ke nisar
dil men ik hasrat-e-benam-o-nishan baaqi hai
aah ye jada-e-pur-ḳham ye bhayanak jangal
dil-e-darmanda-o-umr-e-guzran baaqi hai
dil-e-muztar ko ab ummid-e-mulaqat nahin
yaad teri magar ai dushman-e-jan baaqi hai
Leave a Reply