Ishaq Athar Siddiqui
ashna na-ashna yaron ke beach
munqasim huun kitni divaron ke beach
saans bhi lete nahin kya raste
kya hava bhi chup hai divaron ke beach
ek bhi pahchan men aati nahin
suraten kitni hain bazaron ke beach
dekhna hai kis ko hoti hai shikast
aa.ina hai ek talvaron ke beach
kaisi dharti hai ki phaTti bhi nahin
raqs majburi hai muḳhtaron ke beach
apna apna kasa-e-gham laa.e hain
hai numa.ish si azadaron ke beach
hai unhi se raunaq-e-bazm-e-hayat
phuul khilte hain jo angaron ke beach
kya shua-e-mehr aati hai kabhi
asman bar-dosh divaron ke beach
ham bhi ‘at.har’ ‘mir’ sahab ke tufail
sher kahte hain tarah-daron ke beach
Leave a Reply