koi kamar ko tiri kuchh jo ho kamar to kahe
ki aadmi jo kahe baat soch kar to kahe
miri haqiqat-e-pur-dard ko kabhi us se
ba-ah-o-nala na kahve ba-chashm-e-tar to kahe
ye aarzu hai jahannam ko bhi ki atish-e-ishq
mujhe na shola gar apna kahe sharar to kahe
ba-qadr-e-maya nahin gar har ik ka rutba o naam
to haan habab ko dekhen koi guhar to kahe
kahe jo kuchh mujhe naseh nahin vo divana
ki janta hai kahe ka ho kuchh asar to kahe
jal utthe shama ke manind qissa-khvan ki zaban
hamara qissa-e-pur-soz lahza bhar to kahe
sada hai khuun men bhi mansur ke anal-haq ki
kahe agar koi tauhid is qadar to kahe
majal hai ki tire aage fitna dam maare
kahega aur to kya pahle al-hazar to kahe
bane bala se mira murgh-e-nama-bar bhanvra
ki us ko dekh ke vo munh se khush-khabar to kahe
har ek sher men mazmun-e-girya hai mere
miri tarah se koi ‘zauq’ sher-e-tar to kahe
Leave a Reply