ham hain mata-e-kucha-o-bazar ki tarah
uthti hai har nigah kharidar ki tarah
is ku-e-tishnagi men bahut hai ki ek jaam
haath aa gaya hai daulat-e-bedar ki tarah
vo to kahin hai aur magar dil ke as-pas
phirti hai koi shai nigah-e-yar ki tarah
sidhi hai rah-e-shauq pe yunhi kahin kahin
kham ho gai hai gesu-e-dildar ki tarah
be-tesha-e-nazar na chalo rah-e-raftagan
har naqsh-e-pa buland hai divar ki tarah
ab ja ke kuchh khula hunar-e-nakhun-e-junun
zakhm-e-jigar hue lab-o-rukhsar ki tarah
‘majruh’ likh rahe hain vo ahl-e-vafa ka naam
ham bhi khade hue hain gunahgar ki tarah
Leave a Reply