ada-jafarey

Wahi Na-Saburi-E-Arzu Wahi Naqsh-E-Pa Wahi Jada Hai

vahi na-saburi-e-arzu vahi naqsh-e-pa vahi jaada hai

koi sang-e-rah ko khabar karo usi astan ka irada hai

vahi ashk-e-khun ke gulab hain vahi khaar khaar hai pairahan

na karam ki aas bujhi abhi na sitam ki dhuup ziyada hai

abhi raushni ki lakir si sar-e-rahguzar hai jan-ba-lab

kisi dil ki aas miti nahin kahin ik daricha kushada hai

tan-e-zakhm zakhm ko chhod de mire charagar mire mehrban

dil-e-dagh daagh ka hausla tiri marhamat se ziyada hai

jo nazar bacha ke guzar gae to na aa sakoge palat ke tum

badi mohtaram hai ye bebasi ki khulus-e-jan ka libada hai

yahi zindagi hai buri-bhali ye kashida sar ye barahna-pa

na ghubar-e-rah se muzmahil na sukun-e-jan ka iaada hai

mira iftikhar vafa talak mujhe raas aa na saka ‘ada’

tira naam jis par likha raha vo kitab aaj bhi saada hai

More Poems

Leave a Comment