Murli Dhar Shad
maut aa.egi jo rusva.i ka saman hoga
chaak dil hoga agar chaak gareban hoga
dil ko bahlata huun ye kah ke tiri furqat men
parda-e-ghaib se ḳhud vasl ka saman hoga
hashr men dekhenge rahmat ka tamasha zahid
jab ḳhatavar ḳhataon pe pasheman hoga
malak-ul-maut ko bhi saath gul apne laana
mujh pe ehsan tera ai shab-e-hijran hoga
rahnuma.i rah-e-ulfat men jo ai ḳhizr kare
vo farishta to nahin mujh sa hi insan hoga
ham na kahte the ki hai hosh-ruba husn tira
aa.ina dekh na tu dekh ke hairan hoga
mujh se kahti hai shab-e-vasl pareshan-nazari
aap ke dil men bhi shayad koi arman hoga
ku-e-janan ki havas tujh ko bahut hai ai ‘shad’
ḳhaak ke zarron ki manind pareshan hoga
Leave a Reply