moḌ moḌ ghabraya gaam gaam dahla main
jaane kin ḳharabon ke raston pe nikla main
sat.h-e-ab kah paa.e kya tahon ke afsane
same-e-lab-e-sahil bahr se bhi gahra main
aur kuchh taqaze ka silsila chale yaaro
pal men kaise man ja.un muddaton ka ruTha main
vo ki hai mira apna harf-e-mudda.a us ko
ghair ke havale se kis tarah samajhta main
jaane jazb ho ja.un kab faza ke anchal men
sa.aton ki ankhon se ashk ban ke Dhalka main
ek roz to girtin faslon ki divaren
ek roz to apne saath saath chalta main
kaun hai mira qatil kis ka naam luun ‘ali’
apni hi vafaon ke paniyon men Duuba main
Leave a Reply