shab-e-siyah guzarti hai kin azabon men
bikharte shahr ke manzar hain mere ḳhvabon men
ye aap giniye ki lashen kidhar ziyada hain
main tang-dast huun is tarah ke hisabon men
likha hua tha ki ik dusre se pyaar karo
jale gharon se mili adh-jali kitabon men
sukun ka koi bhi lamha hamen nasib nahin
ḳhushi ki koi bhi sargam nahin rababon men
main baat baat pe rone laga huun so yarab
tu meri ḳhamushi ko darj kar javabon men
Leave a Reply