Isma Hadia
mere to roz-o-shab se ḳhasara nahin gaya
shayad ki tum ko dil se pukara nahin gaya
be-rabt ho ga.i hai tire baad is tarah
phir zindagi ko ham se guzara nahin gaya
mahfuz meri ankhen men ruḳhsat ka vaqt hai
in donon khiḌkiyon se nazara nahin gaya
chehre pe hai ayaan vahi tahrir-e-dil-shikast
mujh se to aur ruup bhi dhara nahin gaya
kashti vafa ki Duubi to bahr-e-yaqin men
maujen ga.i hain saath kinara nahin gaya
TuuTa falak se jo bhi zamin-zad ban gaya
vapas palaT ke phir vo sitara nahin gaya
ai ‘hadia’ sanvar di duniya ki rahguzar
lekin nasib apna sanvara nahin gaya
Leave a Reply