Poet
un ke jalvon pe hama-vaqt nazar hoti hai
kucha-e-yar men yuun apni basar hoti hai
jaane kya chiiz mohabbat ki nazar hoti hai
vo jidhar hote hain duniya hi udhar hoti hai
hosh vaale meri vahshat ko bhala kya samjhen
un ke divanon ko aalam ki ḳhabar hoti hai
ishq men chand-sitaron ki haqiqat kya ho
jalva-e-yar pe qurban sahar hoti hai
aap ki yaad se hota hai mira dil raushan
aap ko dekh ke bedar nazar hoti hai
meri un ko na ḳhabar ho ye koi baat nahin
un ko to saare zamane ki ḳhabar hoti hai
jazba-e-ishq men jannat ki tamanna kaisi
ye bulandi to miri gard-e-safar hoti hai
hech hoti hai nigahon men mata-e-kaunain
mere dilbar ki nazar jab bhi idhar hoti hai
mere daman men sama jaate hain donon aalam
mere janan ki nazar jab bhi idhar hoti hai
aur kya hogi mire ishq ki me.araj ‘fana’
zindagi yaar ke qadmon men basar hoti hai
Leave a Reply