abhi dukhi huun bahut aur bahut udaas huun main
hansun to kaise ki tasvir-e-dard-o-yas huun main
qarib rah ki bhi tu mujh se duur duur raha
ye aur baat ki barson se tere paas huun main
bhaTak raha huun abhi ḳhar-dar sahra men
magar mizaj-e-gulistan se ru-shanas huun main
jo tirgi men diya ban ke raushni baḳhshe
us e’timad ki halki si ek aas huun main
ḳhud apne haath se siita huun aur pahanta huun
is ahd-e-nau ka vo bikhra hua libas huun main
‘kamal’ mujh ko na.i nasl yaad rakkhegi
kitab-e-zist ka ik aisa iqtibas huun main
Leave a Reply