pal pal jiine ki ḳhvahish men karb-e-sham-o-sahar manga
sab the nashat-e-naf.a ke pichhe ham ne ranj-e-zarar manga
ab tak jo dastur-e-junun tha ham ne vahi manzar manga
sahra dil ke barabar chaha aur ya ankhon bhar manga
abr ke ehsan se bachna tha dil ko hara bhi rakhna tha
ham ne us paude ki ḳhatir mauja-e-dida-e-tar manga
fasle kuchh qadmon men sameTe ankhon men kuchh dhuup ke phuul
is ke alava aur na ham ne kuchh saman-e-safar manga
koi sar-o-saman nahin aur andhi har din ka ma.amul
ham ne bhi kya soch samajh kar be-divar ka ghar manga
soch raha huun apni hasti men apna kya hissa tha
dil par yaron ka haq Thahra aur dushman ne sar manga
khula ki vo bhi teri talab ka ik be-nam tasalsul tha
duniya se jo bhi ham ne halat ke zer-e-asar manga
Leave a Reply