Irfan Sattar
suḳhan ke shauq men tauhin harf ki nahin ki
ki ham ne daad ki ḳhvahish men sha.eri nahin ki
jo ḳhud-pasand the un se suḳhan kiya kam kam
jo kaj-kulah the un se to baat bhi nahin ki
kabhi bhi ham ne na ki koi baat maslahatan
munafiqat ki himayat, nahin, kabhi nahin ki
dikha.i deta kahan phir alag se apna vajud
so ham ne zaat ki tafhim aḳhiri nahin ki
use bataya nahin hai ki main badan men nahin
jo baat sab se zaruri hai vo abhi nahin ki
ba-nam-e-ḳhush-nafasi ham to aah bharte rahe
ki sirf ranj kiya ham ne, zindagi nahin ki
hamesha dil ko mayassar rahi hai daulat-e-hijr
junun ke rizq men us ne kabhi kami nahin ki
ba-sad ḳhulus uThata raha sabhi ke ye naaz
hamare dil ne hamari hi dilbari nahin ki
jise vatira bana.e rahi vo chashm-e-ghazal
vo be-ruḳhi ki suhulat hamen bhi thii, nahin ki
hai ek umr se ma.amul roz ka ‘irfan’
dua-e-radd-e-ana ham ne aaj hi nahin ki
Leave a Reply