Akbar Hameedi
abhi zamin ko haft asman banana hai
isi jahan ko mujhe do-jahan banana hai
bhaTak raha hai akela jo koh-o-sahra men
us ek aadmi ko karvan banana hai
ye shaḳh-e-gul jo ghiri hai hazar kanTon men
mujhe isi se naya gulistan banana hai
main janta huun mujhe kya banana hai lekin
vahan banane se pahle yahan banana hai
charagh le ke use shahr shahr dhundhta huun
bas ek shaḳhs mujhe raz-dan banana hai
hamen bhi umr-guzari to karni hai ‘akbar’
unhen bhi mashghala-e-dil-baran banana hai
Leave a Reply