Habib Jalib
ab teri zarurat bhi bahut kam hai miri jaan
ab shauq ka kuchh aur hi aalam hai miri jaan
ab tazkira-e-ḳhanda-e-gul baar hai ji par
jaan vaqf-e-gham-e-giriya-e-shabnam hai miri jaan
ruḳh par tire bikhri hui ye zulf-e-siyah-tab
tasvir-e-pareshani-e-alam hai miri jaan
ye kya ki tujhe bhi hai zamane se shikayat
ye kya ki tiri aankh bhi pur-nam hai miri jaan
ham sada-dilon par ye shab-e-gham ka tasallut
mayus na ho aur koi dam hai miri jaan
ye teri tavajjoh ka hai ejaaz ki mujh se
har shaḳhs tire shahr ka barham hai miri jaan
ai nuz.hat-e-mahtab tira gham hai miri ziist
ai nazish-e-ḳhurshid tira gham hai miri jaan
Leave a Reply