qabza mire badan pe miri ḳhvahishon ka hai
basti miri pe raaj mire dushmanon ka hai
qalb-o-nazar men nuur na.e tajrabon ka hai
ehsan kis qadar ye badalti ruton ka hai
chehre se dhul chuki miri bedariyon ki raakh
ankhon men kuchh ḳhumar abhi ratjagon ka hai
tu so raha tha aur main dastak na de saka
kitna ḳhayal mujh ko tiri rahaton ka hai
shayad vo aaj meri tarah hi tha be-qarar
ya ye bhi koi aks miri uljhanon ka hai
chalti hai jis tarah se tiri nabz tez tez
andaz hu-ba-hu ye miri dhaḌkanon ka hai
jin ke tufail sabz hai kohsar ka badan
sailab vadiyon men unhen barishon ka hai
divangi men meri nahin hai kisi ka haath
saara qusur us men miri adaton ka hai
dil muztarib hai aur siyahat hai be-maza
jaadu abhi hamare saron par gharon ka hai
kya janen kis tarah se use tai karenge ham
darpesh ik safar jo ghane jangalon ka hai
‘betab’ apne haal pe matam na kyuun karun
mujh ko abhi to ranj luTi sa.aton ka hai
Leave a Reply