jis ka rahib shaikh ho but-khana aisa chahiye
mohtasib saaqi bane mai-khana aisa chahiye
rakhta hai sar-khush hamen ek chashm-e-maigun ka khayal
ho na jo paiman-shikan paimana aisa chahiye
ho khayal-e-dair dil men aur na ho pas-e-haram
ashiqon ka maslak-e-rindana aisa chahiye
ik nigah-e-naz par qurban kare hosh-o-khirad
ishq-bazi ke liye farzana aisa chahiye
is ke dil men soz ho aur us ke dil men ho gudaz
shama aisi chahiye parvana aisa chahiye
shama saan ghulte rahen ham aur na ho us ko lagan
‘mashriqi’ maashuq be-parvana aisa chahiye
Leave a Reply