maut aa.i kitni baar na.i zindagi hui
nikli magar na phans jigar men chhupi hui
ab ho bhi koi ma.il-e-lutf-o-karam to kya
hoti nahin shagufta tabi.at bujhi hui
mausam yahi bahar ka hai ishq ke liye
aati nahin palaT ke javani ga.i hui
kuchh zahr ka nasha hai to kuchh tharthari si hai
rag rag men aaj hai koi shai pairti hui
ab-e-hayat bhi koi chhiḌke agar to kya
bujhti nahin hai aag jigar men lagi hui
aa.i hai saans dusri nashtar liye hue
ik saans men hamen jo masarrat kabhi hui
har roz ek dard naya dil men hai ‘jigar’
har raat sochte hain ki had dard ki hui
sahra men chal ke gham ko bhula do uTho ‘jigar’
dekho vo aa rahi hai ghaTa jhumti hui
Leave a Reply