kab miTa.e se miTa ranj-o-su.ubat ka asar
hai vatan men bhi mire chehre pe ghurbat ka asar
ho chala ishq-e-majazi pe haqiqat ka asar
aa chala mujh ko nazar kasrat men vahdat ka asar
saari duniya se nahin mujh se faqat bezar the
aur is se baḌh ke kya hota mohabbat ka asar
be-vafa un ka laqab hai ba-vafa mera ḳhitab
vo hai tinat ki ḳharabi ye hai ulfat ka asar
mo.ajiza dekha tasavvur ka to ankhen khul ga.iin
pa raha huun aaj main jalvat men ḳhalvat ka asar
vo pari se huur ban jaate yaqini baat thi
un ki sirat par agar paḌ jaata surat ka asar
un pe dil hi aa gaya le hi ga.e vo mera dil
ye taqaza husn ka tha vo shararat ka asar
ik jagah rahta na tha Tik kar ye aadat thi miri
khinch laaya ḳhuld tak ab mujh ko vahshat ka asar
ḳhair se milte jo bad-ḳhuni hai chehre se ayaan
ye masal sach hai ki ho jaata hai sohbat ka asar
aap kya the ho ga.e kya faiz se ustad ke
dekh liije ‘shad’ ye hota hai nisbat ka asar
Leave a Reply