Hamesha Jitne Wala Kabhi to Haara Bhi Ho

hamesha jītne vaalā kabhī to haarā bhī ho

mohabbatoñ meñ koī faisla hamārā bhī ho

maiñ is kināre pe baiThā huuñ aur sochtā huuñ

mirī giraft meñ dariyā kā vo kinārā bhī ho

ye shahr chhoḌnā mushkil to hai magar sar-e-dast

kisī ko merā Thaharnā yahāñ gavārā bhī ho

mujhe qubūl nahīñ tohmat-e-duā aur vo

ye chāhtā hai kisī ne use pukārā bhī ho

maiñ āftāb nahīñ huuñ magar kabhī ‘shahzād’

mire madār meñ us shaḳhs kā sitārā bhī ho

Leave a Comment