Hazin Ludhianvi
hairan saara shahr tha jis ki uḌaan par
panchhi vo phaḌ phaḌa ke gira sa.eban par
shayad usi se zehan ka jangal mahak uThe
lafzon ke gul khila.iye shaḳh-e-zaban par
kis dil ki raakh juzv-e-rag-e-sang ho ga.i
suraj-mukhi ka phuul khila hai chaTan par
ik din use zamin ki kashish khinch la.egi
kab tak rahega tera ḳhayal asman par
avaz ki mahak na kabhi qaid ho saki
pahre lage hazar gulon ki zaban par
Leave a Reply