phir hunar-mandon ke ghar se be-hunar jaata huun main
tum ḳhabar be-zar ho ahl-e-nazar jaata huun main
jeb men rakh li hain kyuun tum ne zabanen kaaT kar
kis se ab ye ajnabi puchhe kidhar jaata huun main
haan main saaya huun kisi shai ka magar ye bhi to dekh
gar ta.aqub men na ho suraj to mar jaata huun main
haath ankhon se uTha kar dekh mujh se kuchh na puchh
kyuun ufuq par phailti sub.hon se Dar jaata huun main
bas yunhi tanha rahunga is safar men umr bhar
jis taraf koi nahin jaata udhar jaata huun main
ḳhauf ki ye intiha sadiyon se ankhen band hain
shauq ki ye ablahi be-bal-o-par jaata huun main
‘arsh’ rasmon ki panah-gahen bhi ab sar par nahin
aur vahshi raston par be-sipar jaata huun main
Leave a Reply