mohlat na mili khvab ki taabir uthate
ham maare gae tuute hue tiir uthate
mamur thiin suraj ki gavahi pe havaen
phir saae kahan dhuup ki jagir uthate
tujh tak bhi pahunchne ke liye vaqt nahin tha
kab daulat-e-duniya tire rah-gir uthate
bas ek hi khvahish sar-e-maqtal hamen yaad aai
zindan se nikalte hue zanjir uthate
us vaqt bhi hathon ne qalam ko nahin chhoda
jab in pe zaruri tha ki shamshir uthate
ham log ‘salim’ asal se kat kar nahin jiite
kya soch ke akhir koi tasvir uthate
Leave a Reply