ankhon se ayaan zakhm ki gahrai to ab hai
ab aa bhi chuko vaqt-e-masihai to ab hai
pahle gham-e-furqat ke ye tevar to nahin the
rag rag men utarti hui tanhai to ab hai
taari hai tamannaon pe sakrat ka aalam
har saans rifaqat ki tamannai to ab hai
kal tak miri vahshat se faqat tum hi the agah
har gaam pe andesha-e-rusvai to ab hai
kya jaane mahakti hui subhon men koi dil
shamon men kisi dard ki raanai to ab hai
dil-soz ye taare hain to jan-soz ye mahtab
dar-asal shab-e-anjuman-arai to ab hai
saf-basta hain har mod pe kuchh sang-ba-kaf log
ai zakhm-e-hunar lutf-e-pazirai to ab hai
Leave a Reply