Abr-E-Siyah Qaus-E-Quzah Chandni Ghazal

abr-e-siyāh qaus-e-quzah chāñdnī ġhazal

har manzar-e-hayāt meñ Dhaltī rahī ġhazal

shānoñ pe us ne Daal dī ik surma.ī ġhazal

jaise falak se aa.e koī jhūmtī ġhazal

oḌhī kabhī to ham ne bichā.ī kabhī ġhazal

lekin hamāre kaam na aa.ī koī ġhazal

jab bhī tasavvurāt ne āvāz dī tujhe

tahrīr dil pe ho ga.ī ik chāñd sī ġhazal

har shai huzūr-e-husn meñ nākām ho ga.ī

ho pañkhuḌī gulāb kī yā ‘mīr’ kī ġhazal

kis ke firāq ne use dīvāna kar diyā

phirtī hai maarī maarī galī dar galī ġhazal

vo aur the ki jin ko sahīfe diye ga.e

ham jaise ahl-e-dil pe utārī ga.ī ġhazal

de kar mire ḳhayāl ko tābinda pairahan

ustād-e-mohtaram ne sañvārī mirī ġhazal

paḌhte rahe ‘suhaib’ baḌī ān-bān se

ham roz mahfiloñ meñ churā.ī huī ġhazal

Leave a Comment