Har Tamashai Faqat Sahil Se Manzar dekhta

Ahmad Faraz

har tamashai faqat sahil se manzar dekhta

kaun dariya ko ulatta kaun gauhar dekhta

vo to duniya ko miri divangi khush aa gai

tere hathon men vagarna pahla patthar dekhta

aankh men aansu jude the par sada tujh ko na di

is tavaqqoa par ki shayad tu palat kar dekhta

meri qismat ki lakiren mere hathon men na thiin

tere mathe par koi mera muqaddar dekhta

zindagi phaili hui thi sham-e-hijran ki tarah

kis ko itna hausla tha kaun ji kar dekhta

dubne vaala tha aur sahil pe chehron ka hujum

pal ki mohlat thi main kis ko aankh bhar kar dekhta

tu bhi dil ko ek khuun ki buund samjha hai ‘faraz’

aankh agar hoti to qatre men samundar dekhta