laa.i nahin payam koi zulf-e-yar se
mujh ko shikayaten hain nasim-e-bahar se
khela ho jo darazi-e-gesu-e-yar se
vo kya Darega tul-e-shab-e-intizar se
ahista ai nasim ki ye zindagi miri
milti hui hai sham-e-sar-e-rah-guzar se
mera hi ek aks hai kya tuur kya kalim
dekhe koi mujhe nigah-e-e’tibar se
ik daagh hi sahi Thahar ai marg-e-na-gahan
le jaa.en kuchh to alam-e-na-pa.edar se
mujh ko miTa.e gardish-e-lail-o-nahar kya
bahar hai ishq gardish-e-lail-o-nahar se
vo dil ke aa.ine men rahe aur miri nazar
aage baḌhi na a.ina-e-e’tibar se
ham be-ḳhudan-e-ishq se kya pursish-e-bahar
puchho hamare pairahan-e-tar-tar se
meri tarah unhen bhi na rusva kare ‘zafar’
Darta huun apne nala-e-be-iḳhtiyar se
Leave a Reply