Asra Rizvi
phir koi taza-sitam vo sitam-ijad kare
kaash is karb-e-taghaful se ab azad kare
kahin banjar hi na ho jaa.e mire dil ki zamin
lala-e-zaḳhm se is kisht ko abad kare
janta tha ke har avaz palaT aa.egi
phir tavatur se dua kyuun dil-e-nashad kare
apne lahje ki hi saḳhti ko tasavvur kar ke
lauT aane ki shab-e-hijr men fariyad kare
gam-dar-gam badalta hai chalan zalim ka
jaane is baar na.i kaun si bedad kare
us se kah de koi ḳhamosh hai saz-e-hasti
chheḌ kar vasl ka naghma mira dil shaad kare
log anjam ki dahshat se nikal aa.e hain
ab jo kar paa.e to is shahr ko barbad kare
Leave a Reply