Hastimal Hasti
dil men jo mohabbat ki raushni nahin hoti
itni ḳhubsurat ye zindagi nahin hoti
dost pe karam karna aur hisab bhi rakhna
karobar hota hai dosti nahin hoti
ḳhud charagh ban ke jal vaqt ke andhere men
bhiik ke ujalon se raushni nahin hoti
sha.eri hai sarmaya ḳhush-nasib logon ka
baans ki har ik Tahni bansuri nahin hoti
khel zindagi ke tum khelte raho yaaro
haar jiit koi bhi aḳhiri nahin hoti
Leave a Reply