Kisi Nishan Se Alamat Se Ya Sanad Se Na Ho

Sufi

kisi nishan se alamat se ya sanad se na ho

agar main huun to ye hona bhi khal-o-khad se na ho

main ek aise zamane men basna chahta huun

zamana jis ka taalluq azal abad se na ho

mire adu vo haqiqat bhi kya haqiqat hai

subut jis ka mayassar usi ke rad se na ho

isi liye to main rakhta huun khushbuon sa mizaj

main chahta huun ki mera shumar had se na ho

banane vaala huun hathon se apne farda ka

vo zaicha jo lakiron se ya adad se na ho

vajud vahima hai ai badan-nazhad samajh

ye tera saaya bhi shayad tire jasad se na ho

main apna aap usi ke supurd kar dunga

ik aisa shakhs jo amboh-e-nek-o-bad se na ho