Raat Bhar Gardish Thi Un Ke Pasbanon Ki Tarah

Bekhud Dehlvi

raat bhar gardish thi un ke pasbanon ki tarah

paanv men chakkar tha mere asmanon ki tarah

dil men hain lekin unhen dil se gharaz-matlab nahin

apne ghar men rahte hain vo mehmanon ki tarah

dil ke dene ka kahin charcha na karna dekhna

le ke dil samjha rahe hain mehrbanon ki tarah

naam par marne ke marte hain magar marte nahin

kaun ji sakta hai ham se saḳht-janon ki tarah

dil jo kuchh kahta hai karte hain vahi ‘beḳhud’ magar

sun liya karte hain sab ki be-zabanon ki tarah