narjis-afroz-zaidi

Apne Pindar Se Ghat Kar Nahin Qaem Rahta

apne pindar se ghat kar nahin qaaem rahta

fard kirdar se hat kar nahin qaaem rahta

aks bat jaata hai ainon men lekin ai dil

aaina aks men bat kar nahin qaaem rahta

koi bhi naqsh ho kitna hi mukammal lekin

vaqt ki gard men at kar nahin qaaem rahta

asmanon men udanon ka maza hoga magar

koi bhi khaak se kat kar nahin qaaem rahta

rose ik raah nai shauq-e-safar mangta hai

daeron men hi simat kar nahin qaaem rahta

qita-e-jan ko jalata hua is dhuup ka rang

chhanv se teri lipat kar nahin qaaem rahta

yaad men un ki kai baar bikhar jaata hai

dil bhi kya hai ki simat kar nahin qaaem rahta

dil vo bachcha ki isi pal men humakna chahe

ye vo lamha ki palat kar nahin qaaem rahta

More Poems

Leave a Comment