sabz hai pairahan chand ka aaj phir
rang-e-rukHsar hai surḳh sa aaj phir
kar ga.i kaam teri ada aaj phir
sehn-e-gul ne kaha marhaba aaj phir
tere paikar ko chhu kar chali aa.i hai
marmarin hai badan raat ka aaj phir
le ke aghosh men chand ko asman
munh zamin ko chiḌhata raha aaj phir
yaad chandan-vanon se guzarti rahi
man men sandal mahakta raha aaj phir
dil ki nakamiyan hi ḳhata-var hain
vo gunahon ka hai devta aaj phir
chand suraj hue amne-samne
imtihan sagaron ka raha aaj phir
aao ‘alok’ sair-e-chaman ko chalen
uTh ke aa.i hai kaali ghaTa aaj phir
Leave a Reply