bahut malul bade shadman gae hue hain
ham aaj ham-rah-e-gum-gashtagan gae hue hain
agarche aae huon hi ke saath hain ham bhi
magar gae huon ke darmiyan gae hue hain
nazar to aate hain kamron men chalte-phirte magar
ye ghar ke log na jaane kahan gae hue hain
sahar ko ham se milo go ki shab men bhi hain yahin
ye koi thiik nahin kab kahan gae hue hain
kahin se laut ke qisse sunaenge tum ko
kahin sunane ko ham dastan gae hue hain
talashiye phir inhin men tarashiye phir inhen
yahi vasile ki jo raegan gae hote hain
abhi taayyun-e-sat.h-e-kalam kya puchho
abhi to ham tah-e-ijz-e-bayan gae hue hain
baja ki raaz ki baten bataenge tumhen ‘saz’
magar sambhal hi ke sunna miyan gae hue hain
Leave a Reply