dard thamta hi nahin siine men aram ke ba.ad
ham to jalte hain charaghon ki tarah shaam ke ba.ad
bas yahi soch ke akasr main laraz jaata huun
jaane kya hoga mira hashr ke hangam ke ba.ad
ishq kar baiThe magar ham ne ye socha hi nahin
ḳhaak ho ja.enge ham ishq ke anjam ke ba.ad
likh ke kaghaz pe tira naam qalam toḌ diya
koi bhaya hi nahin mujh ko tire naam ke ba.ad
gham ke sailab men phir bah gaya maskan mera
chain paaya hi tha ik barish-e-alam ke ba.ad
mire qatil ne miri laash pe dam toḌ diya
vo pasheman tha bahut qatl ke ilzam ke ba.ad
ham ne sikha hai hunar fat.h-o-zafaryabi ka
azm apna hai javan koshish-e-nakam ke ba.ad
sang-sari-o-malamat hue ab apne nasib
ham to barbad hue kucha-e-asnam ke ba.ad
kya ḳhizan aa.i ki barbad hua saara chaman
rah ga.i ah-o-fughan gulshan-e-gulfam ke ba.ad
Leave a Reply