zinat-e-shahr-e-vafa ku-e-butan hain kuchh log
naqsh dhundle hi sahi sajda-kunan hain kuchh log
saf-go pak-nazar narm-zaban hain kuchh log
tab-e-nazuk pe magar phir bhi giran hain kuchh log
sham-e-ehsas ki lau aur zara tez karo
duur rah kar bhi qarib-e-rag-e-jan hain kuchh log
aap ki meri vafaon ka yahan zikr hi kya
miT ga.e aise ki qadmon ke nishan hain kuchh log
duur tak koi tasalli na kisi ka daman
kis tavaqqo pe bhala ashk-fishan hain kuchh log
apni marzi se na hanste hain na ro sakte hain
aap ki bazm men aise bhi yahan hain kuchh log
kis ko andaza hai majruh dilon ka yaaro
bazm-e-ishrat men bhi ma.il-ba-fughan hain kuchh log
jiite ji un ka kabhi naam na lunga ‘nayyar’
ḳhun-e-taza ki tarah dil men ravan hain kuchh log
Leave a Reply