Abhishek Shukla
fasil-e-jism gira de makan-e-jan se nikal
ye intishar-zada shahr hai yahan se nikal
tiri talash men phirte hain aftab kai
so ab ye farz hai tujh par ki saeban se nikal
tamam shahr pe ik khamushi musallat hai
ab aisa kar ki kisi din miri zaban se nikal
maqam-e-vasl to arz-o-sama ke biich men hai
main is zamin se niklun tu asman se nikal
main apni zaat men tarikiyan samete huun
tu ik charagh jala aur ab yahan se nikal
kaha tha mujh se bhi ik din hava-e-sahra ne
miri panah men aa ja ghubar-e-jan se nikal
Leave a Reply