Poet
usi ne saath diya zindagi ki rahon men
vo ik charagh jo jalta raha nigahon men
shamim-e-gul se subuk-tar kiran se nazuk-tar
koi latif si shai aa ga.i hai bahon men
ye kis ki hashr-ḳhirami ki baat uTThi hai
hamara naam pukara gaya gavahon men
ḳhabar na thi ki vahi apni yuun ḳhabar lenge
shumar karte the ham jin ko ḳhair-ḳhvahon men
abhi hain raakh men chingariyan dabi lekin
maza kahan hai vo pahla sa ab ki chahun men
hamin ne ziist ke har ruup ko sanvara hai
luTa ke raushani-e-tab.a jalva-gahon men
ragon men jaise ravan hai lahu ‘tamanna.i’
kisi ki mauj-e-karam hai mire gunahon men
Leave a Reply