tha pahla safar us ki rifaqat bhi na.i thi
raste bhi kaThin aur masafat bhi na.i thi
dil tha ki kisi taur bhi qaabu men nahin tha
rah rah ke dhaḌakne ki alamat bhi na.i thi
jab us ne kaha tha ki mujhe ishq hai tum se
ankhon men jo aa.i thi vo hairat bhi na.i thi
sadiyon ke ta.alluq ka guman hone laga tha
jab ki miri us shaḳhs se nisbat bhi na.i thi
vaqif bhi nahin tha main kisi sud-o-ziyan se
us ishq ke saude men shirakat bhi na.i thi
ḳhvabon ke bikhar jaane ka dhaḌka bhi laga tha
be-dari-e-shab ki mujhe aadat bhi na.i thi
ta.abir kahan DhunDne jatin miri ankhen
un ko to kisi ḳhvab ki zahmat bhi na.i thi
dil vaqif-e-adab-e-mohabbat bhi nahin tha
duniya ke rivajon se baghavat bhi na.i thi
phir main ki kisi nashe ka aadi bhi nahin tha
aur mere liye vasl ki lazzat bhi na.i thi
yuun kar-e-junun karna ḳhirad-mandon men rah kar
jo Daali thi tum ne vo rivayat bhi na.i thi
Leave a Reply