shua.en aise mire jism se guzarti ga.iin
lahu men jaise mire kirchiyan utarti ga.iin
na jaane chehre huun a.inda nasl ke kaise
bas ek ḳhauf se meri ragen sikuḌti ga.iin
mujhe to lagte hain naḳhun bhi apne zahar bujhe
mere liye to miri ungliyan bhi marti ga.iin
jazire kitne garan paniyon ki god men hain
panah ke liye sochen miri bikharti ga.iin
ye gardishon ka tavazun bigaḌ na jaa.e kahin
isi tarah jo zamin ki tahen udhaḌti ga.iin
ḳhala hayat ke imkan se to nahin aari
pa justujuen kuchh apni hi maand paḌti ga.iin
Leave a Reply