shahr ke goshon men hain bikhre hue
pa-shikasta sar-burida khvab
jin se shahr vaale be-khabar!
ghumta huun shahr ke goshon men roz o shab
ki un ko jama kar luun
dil ki bhatti men tapaun
jis se chhat jaae purana mail
un ke dast-o-pa phir se ubhar aaen
chamak utthen lab o rukhsar o gardan
jaise nau-arasta dulhon ke dil ki hasraten
phir se in khvabon ko samt-e-rah mile!
”khvab le lo khvab….”
subh hote chauk men ja kar lagata huun sada
khvab asli hain ki naqli?”
yuun parakhte hain ki jaise un se badh kar
khvab-dan koi na ho!
khvab-gar main bhi nahin
surat-gar-e-sani huun bas
haan magar meri maishat ka sahara khvab hain!
shaam ho jaati hai
main phir se lagata huun sada
muft le lo muft, ye sone ke khvab”
”muft” sun kar aur dar jaate hain log
aur chupke se sarak jaate hain log
”dekhna ye ”muft” kahta hai
koi dhoka na ho?
aisa koi shoabada pinhan na ho?
ghar pahunch kar tuut jaaen
ya pighal jaaen ye khvab?
bhak se ud jaaen kahin
ya ham pe koi sehr kar dalen ye khvab
ji nahin kis kaam ke?
aise kabadi ke ye khvab
aise na-bina kabadi ke ye khvab!”
raat ho jaati hai
khvabon ke pulande sar pe rakh kar
munh bisore lautta huun
raat bhar phir badbadata huun
”ye le lo khvab….”
”aur le lo mujh se in ke daam bhi
khvab le lo, khvab
mere khvab
khvab mere khvab
khvab
in ke daam bhi”