Navneet Sharma
bina ro.e guzarna us gali se
laga aisa ga.e ham zindagi se
jiya huun umr bhar main bhi akela
use bhi kya mila narazgi se
huun jiska muntazir agle janam tak
mili to kya kahunga us pari se
lahu men roz apne hi nahana
main aajiz aa gaya huun sha.eri se
jhalak ik maut ki dekhe to manun
jise Dar lag raha hai zindagi se
koi phir se dila.e ek jivan
thakan hoti nahin avargi se
ka.i jazbon ka ghar tha jaise main bhi
miri parten khulin divangi se
ka.i chehre dikhe par ba.ad un ke
mohabbat ho ga.i be-chehragi se
kisi surat alag hone na paa.i
tiri tasvir meri sha.eri se
khaḌa jab se huun main apne muqabil
ulajhta hi nahin huun main kisi se
tiri yaden hain ya suraj hai koi
ye ankhen bujh rahi hain raushni se
umiden thi hamen bhi chand se par
mohabbat hai use ab tirgi se
zarurat kya hai man men jhankne ki
karo, gar baat kar paao nadi se
mire aansu jo tum jharne se bah jaao
samundar tak pahunch ja.un isi se
Leave a Reply