hans len ye sitare bhi abhi raat ke uupar
din chaḌhte hi aa ja.enge auqat ke uupar
ban jaa.e na virani-e-dil apni tamasha
ham ḳhol chaḌha lete hain ik zaat ke uupar
pahle to samajhte rahe har shai ko tamasha
ab roke bhi kya kijiye halat ke uupar
dekha hai uchhalti hui dastaron ka manzar
ik fitna-e-dauran se mulaqat ke uupar
vaa.iz kabhi maidan-e-amal men bhi qadam rakh
is silsila-e-kashf-o-karamat ke uupar
ibrat to koi lene ko tayyar nahin hai
haan jashn manate hain mazarat ke uupar
‘az.har’ na thi is baat men kuchh bhi to haqiqat
ik hashr sa barpa hua jis baat ke uupar
Leave a Reply