Muzaffar Warsi
teri jhalak nigah ke har zaviye men hai
dekhun to shakl apni mire aa.ine men hai
laTki hui hai ruuh ki suuli pe zindagi
sanson ka silsila hai ki rassi gale men hai
kanTon ki pyaas ne mujhe khincha barahna-pa
jaise bhari sabil har ik aable men hai
sanson ki oT le ke chala huun charagh-e-dil
siine men jo nahin vo ghuTan raste men hai
meri sada ke phuul chaḌhate hain mujh pe log
zinda to huun magar mira fan maqbare men hai
Dalon kahan paḌav ki raste bhi hain ravan
manzil kahan mile ki vo ḳhud qafile men hai
main tujh ko chahta huun go hasil na kar sakun
lazzat vo qurb men kahan jo fasle men hai
paaya sila ye tujh ko ‘muzaffar’ ne DhunDh kar
shamil ab us ka naam bhi tere pate men hai
Leave a Reply