Apna Chehra Dikha Gain Lahren

apnā chehra dikhā ga.iiñ lahreñ

bastiyoñ ko Darā ga.iiñ lahreñ

ret par raat zindagī likkhī

sub.h aa kar miTā ga.iiñ lahreñ

in zamīnoñ kī kokh se janme

āsmānoñ ko khā ga.iiñ lahreñ

jis se raushan thā dil kā vīrāna

vo diyā bhī bujhā ga.iiñ lahreñ

koī thāme hue thā Dor udhar

ab ke sab ko batā ga.iiñ lahreñ

merā chehra thā ret kā chehra

ek pal meñ miTā ga.iiñ lahreñ

Leave a Comment