lab-e-mantiq rahe koi na chashm-e-lan-tarani ho
zamin phir se murattab ho falak par nazar-e-sani ho
abhi tak ham ne jo manga tire shayan nahin manga
sikha de ham ko kun kahna jo teri mehrbani ho
ḳhas-e-be-majra hain ḳhaar be-bazar hain to kya
numu-shahkar ham bhi hain hamari bhi kisani ho
milenge dhuup ki maari chaTanon men bhi ḳhvab-e-nam
koi ḳhushki nahin aisi jahan tah men na paani ho
lahu ko bhi tanaffus hi ravan rakhta hai ḳhaliyon men
bahe sahra men bhi kashti agar zor-e-duḳhani ho
baḌa surḳhab par nikla badan ka ḳhun-chakan rahna
shafaq sayyah ki lazim thi rangat arghavani ho
taḳhatub ke liye ‘tafzil’ abjad mere hazir hain
koi naqqara-ḳhana ho ki bait be-zabani ho
Leave a Reply